Бүгін қасиетті Рамазан айының құрметіне Шымкент қаласы, Құрсай мөлтек ауданы, Егізтөбе көшесінде «Ел үлесі – пәтерге» қайырымдылық шарасының №537-ші баспана кілтін табыстау шарасы ұйымдастырылды.
Игі шараға ҚМДБ-ның «Зекет және қайырымдылық» қорының директоры Қанат қажы Қыдырмин, шаһар бас имам орынбасары Мұсабек Ақтамберді, қалалық «Зекет және қайырымдылық» қорының жетекшісі Айбек Азимбаев мен демеуші азаматтар қатысты.
Игі шарада ҚМДБ-ның «Зекет және қайырымдылық» қорының директоры Қанат қажы Қыдырмин құттықтау сөз сөйлеп және ҚМДБ Төрағасы, Бас мүфти Наурызбай қажы Тағанұлының сәлемін жеткізіп, №537 баспана кілтін жалғыз өзі бірнеше немере бағып отырған баспанаға аса мұқтаж Қаратаева Жиде апамызға табыс етті. Сондай-ақ, осындай игі жұмыстарға қаржылай қолдау білдірген белгілі кәсіпкерлер Сәбитов Мейірман Пердебайұлына, Рахимов Дәурен Мұстафаұлына, Бахарами Диас Үсенұлына өз алғысын білдірді. Жалпы, үйдің құжаттары түгел, үйдің іші толық бітіп, тұрмыстық қажетті жабдықтармен қамтамасыз етілді.
Айта кетсек, шаһар бас имамы Бақдаулет қажы Нұрматұлының ұйымдастыруымен жуық арада тағы бір үй пайдалануға беріледі.
Қоныс құтты һәм жайлы, берекелі болсын!
ҚМДБ-ның Шымкент қаласы бойынша баспасөз қызметі
