Қазақстан мұсылмандары діни басқармасының төрағасы, Бас мүфти Наурызбай қажы Тағанұлының бастамасымен «QAMQOR-SHARAPAT» салттық қызмет көрсету орталығының жұмысын жетілдіру, сондай-ақ ел аумағындағы зираттарды цифрландыру бойынша жұмыстар атқарылуда.
Қазіргі таңда мешіт қызметкерлері мен еріктілердің атсалысуымен 10 облыс орталықтарындағы зираттарға цифрландыру жұмыстары жүргізілуде. Зираттарды цифрландыру жұмыстары бойынша «QAMQOR-SHARAPAT» орталығының директоры Мейрамбек Қабылбекұлы мен «Sharapat Digital» ЖШС директоры Еркін Тойжановпен бастаған жұмысшы топ іс-сапармен Ұлытау обылысына барып қайтты.
Ұлытау облысының орталығы Жезқазған қаласында ұйымдастырылған семинарға ҚМДБ-ның Ұлытау облысының бас имамы Елдос Қуандықұлы, облыстық дін істері басқармасының мамандары, ардагерлер кеңесі мен қоғам белсенділері және еріктілер қатысты.
Ардагерлер кеңесінің төрағасы Мұрат Сутенұлы ҚМДБ-ға қарасты «QAMQOR-SHARAPAT» салттық қызмет көрсету орталығының зираттарды цифрландыру жұмысын қолдап, жұмыстарына береке тілеп, батасын берді.
Аталған іс-шарадан кейін, семинарға қатысушылар Жезқазған қаласындағы үлкен зиратқа барып цифрландыру жұмыстарына атсалысты. Шара соңында ҚМДБ-ның Ұлытау облысының бас имамы Елдос Қуандықұлы, «QAMQOR-SHARAPAT» орталығының директоры Мейрамбек Қабылбекұлы мен «Sharapat Digital» ЖШС директоры Еркін Тойжанов «Жошы хан» кесенесіне зиярат етіп, ата-бабалар рухына Құран бағыштап, дұға жасалды.