ҚМДБ Төрағасы, Бас мүфти Наурызбай қажы Тағанұлының биыл жолдаған Бағдарлық баяндамасына орай «Ислам және дәстүр құндылығы» жылы аясында Шымкент қаласы өкілдігі мен «Шымкент» медресе-колледжінің ұйымдастыруымен қыздар бөлімінде «Салт-дәстүр» орталығының ашылу шарасы өтті.
Игі шараға Шымкент қаласының бас имамы Бақдаулет қажы Нұрматұлы, «Шымкент» медресе колледжінің директоры Талғат Әсембай, дінтанушы-магистр Мұхамеджан Естеміров, наиб имам Қазыбек Сарыбаев, Ахметжан Керімбек, Самат Анарбаев және «Әжелер» мектебінің жетекшісі Қалдыкүл Бекжанова бастаған әжелер, ұстаздар, шәкірттер қатысты.
«Бұл орталықтың негізгі мақсаты – шәкіртерге дін мен салт-дәстүрімізді және қазақи тәлім-тәрбиені жан-жақты ғылыми тұрғыдан түсіндіру һәм үйрету. Мұнымен қатар, отбасылық өмірде күнделікті атқарылатын құндылықтар, ас әзірлеу, дастархан жаю, кесте тігу, т.б. дүниелер қамтылады», – деді шаһар бас имамы Бақдаулет қажы Нұрматұлы.
Аталмыш орталықтың арнайы жоспары әзірленіп, «Салт-дәстүр» орталығының жұмысын үйлестіруші болып Райхан Жұмәділлева бекітілді.
Айта кетсек, аталмыш оқу орнында 253 қыз-бала шәкірттерге 22 әйел ұстаз қызмет етіп келеді. Өздеріңізге белгілі, жыл басында ҚМДБ Төрағасы, Бас мүфти Наурызбай қажы Тағанұлының бастамасымен Дін мен дәстүр бөлімі ашылып, бүгінде жемісті қызмет атқарылып келеді.