Оралда Батыс Қазақстан облыстық орталық мешітінің ұйымдастыруымен «Әһли сүннет уал жамағат кімдер?» тақырыбында өңір имамдарының біліктілігін арттыру семинары өтті.
Семинарға облыс бойынша 20-дан астам дін қызметкері қатысып, білімін жетілдірді. Облыс бас имамы Самат Әлібаев имамдарға семинар өзектілігін айтып, білімді болуға, дін жолында аянбай еңбек етуге шақырды.
Облыс бойынша шариғат және пәтуа бөліміне жауапты Әсет Романқұлов, «Қамқор-Шарапат» орталығының өкілі Әзілхан Бисенғалиев, «Халал Даму» жетекші маманы Асхат Асылбеков және «Орал» медресе-колледжінің ұстазы Ерлан Кенжин баяндамаларын оқып, кеңінен түсіндірді.
Семинар барысында имамдар өздерін толғандырған сауалдарын қойып, жетекші мамандардың лекцияларын ұйып тыңдап, жазып алып отырды.
Қатысқан имамдарға сертификаттарды бас имам Самат Қанатқалиұлы өз қолымен табыстады. Жыл басынан бері имамдардың діни білімін жетілдіру семинары алғашқы рет өткізіліп отыр. Семинар алдағы уақытта өз жалғасын таппақ.
